Олон улсын кино наадам

Сан Себастьяны кино наадам нь дэлхийн хамгийн чухал кино наадмын нэг гэдгээрээ алдартай. Энд кино урлагийн түүхэн дэх хэд хэдэн чухал үйл явдал буюу Альфред Хичкокийн “Vertigo” киноны олон улсын нээлт, “Оддын дайн”-ын Европын нээлт зэргийг хийсэн гэдгээрээ онцлог. Хэдийгээр уг наадам анх испани хэлээрх кино бүтээлүүдэд төвлөрөх зорилготой байсан ч 1950-аад оны сүүлээр бусад хэлээрх кинонуудыг хүлээн авч толилуулдаг болжээ.

Москвагийн олон улсын кино наадмын нэр хүнд, дэлхийн кино бүтээх үйл явцад үзүүлэх нөлөө ихээхэн өссөөр ирсэн билээ. Уг кино наадам дэлхийн кино урлагийн гарамгай мастерууд болох Акира Куросава, Стэнли Крамер, Федерико Феллини болон Этторе Скола, Анджей Вайда, Франческо Роси, Кшиштоф Занусси, Дамиано Дамиани, Глеб Панфилов, Сергей Герасимов, Бернард Бельего нарт кино наадмын зүгээс шагнал гардуулж байв. Үүнээс гадна энэхүү наадам нь Иштван Сабо, Кането Шиндо, Кшиштоф Киесловски, Аки Каурисмаки, Кохэй Огури, Умберто Солас зэрэг дэлхий даяар алдартай болсон кино найруулагчдын замыг зассан гэдгээрээ бахархдаг.

Монреалын дэлхийн кино наадмын (Монреалын олон улсын кино наадам) зорилго нь үндэстнүүдийн соёлын олон талт байдал, харилцан ойлголцлыг хөхиүлэн дэмжих, чанартай кино урлагийг хөгжүүлэх замаар бүх тивийн кино урлаг болон кино бүтээгчдийг хөгжүүлэх; шинэ авьяастнууд, шинэлэг бүтээлүүдийг сурталчлах, нээн илрүүлэх, урамшуулах явдал юм.

Мар дель Плата олон улсын кино наадам нь Аргентины болон олон улсын кино урлагийн ертөнцийг олонд толилуулах хэрэгцээ шаардлагаас үүдэлтэй юм. Тус наадам жил ирэх тусам кино урлаг, дуу дүрсний урлагийн талбар дахь хөгжил, санал сэдэл солилцооны тод жишээ болсоор байгаа бөгөө д кино найруулагч, жүжигчид, продюсер, дистрибьютер, кино сонирхогчдын хувьд энэ наадамд заавал очиж үзэх хэрэгтэй наадмын нэг болжээ.

Локарногийн кино наадам нь гоо зүйн чанартай кино бүтээлүүдийг сурталчлах, дэлхийн шилдэг шинэ бүтээлүүдийг толилуулах, ялангуяа шинэ тутам кино бүтээлчдийн шинэ илэрхийлэмжийг таниулах зорилготой юм.

Бенгалуругийн олон улсын кино наадам нь Энэтхэгийн Карнатака муж улсын нийслэл Бангалор хотод жил бүр зохиогддог кино наадам бөгөөд дэлхийн өнцөг булан бүрээс сонгосон бүхий л төрлийн киног толилуулдгаараа онцлогтой.

Берлиний кино наадмын хөтөлбөрийн хүрээнд жил бүр 350 орчим киног толилуулдаг бөгөөд тэдгээр кинонуудын ихэнх нь дэлхийн болон Европын нээлтээ хийдэг ажээ. Ямар ч форм, жанр, урт, форматтай бүтээлээ кино наадам руу илгээх боломжтой. Берлиний олон улсын кино наадам нь дэлхийн кино урлагийн чигийг тодорхойлдог гэж үздэг. Наадмын хүрээнд кино худалдан борлуулах “Европын кино зах зээл” зохион байгуулагддаг.

Каирын олон улсын кино наадам нь Каирын олон улсын кино наадмын сангаас жил бүр уламжлал болгон зохион байгуулдаг, Египет болон олон улсын төрийн болон хувийн хэвшлийн байгууллагууд ивээн тэтгэдэг наадам юм. Наадмын зорилго нь кино боловсролыг дээшлүүлэх, улс орнуудын уран бүтээлчдийн холбоог бэхжүүлэх, мэргэжлийн хүмүүстэй уулзах боломжийг олгох, өөр өөр соёлтой кино уран бүтээлчдийн хоорондын гүүрийг бий болгох, улмаар Египетийн кино урлагийг Арабын ертөнц болон бусад улс орнуудад сурталчлах явдал юм.

Каннын олон улсын кино наадам нь кино сонирхогч, кино найруулагч, продюсер, худалдан авагч, түгээгчдийг хамран зохион байгуулагддаг дэлхийн кино урлагийн хамгийн том арга хэмжээ юм. Тус наадмын зорилго нь кино урлагийн хөгжил хувьсалд хувь нэмрээ оруулах, дэлхийн хэмжээнд кино урлагийн хөгжлийг дэмжих зорилгоор чанартай бүтээлүүдийг нээн илрүүлж, анхаарлаа хандуулах явдал юм. Каннын кино наадмын үеэр зохиогддог Marché du Film нь дэлхийн хамгийн том кино худалдааны түр зах болдгоороо онцлогтой.