Монгол Улсын Соёлын Гавьяат Зүтгэлтэн, баримтат киноны найруулагч, кино зохиолч Ч.Гомбо агсны мэндэлсний 90 насны ойд зориулан түүний кино зохиолын эмхэтгэл бүхий “Ч.Гомбо Кино зохиолууд” номын нээлтийг 2024 оны 12 дугаар сарын 19-ний өдөр МУИС-ийн Номын санд Кино урлагийн зөвлөлтэй хамтран зохион байгуулав.

Уг бүтээл нь “Анхны алхам”, “Баянбулгийнхан”, “Моторын дуу”, “Хань”, “Давааны цаана даваа” гэх зэрэг олон түмэнд алдаршсан найман кино зохиол, дөрвөн өгүүллэг, Зохиолч Ч.Гомбын уран бүтээлүүдийн судлал шүүмж зэрэг үндсэн гурван агуулгаас бүрдсэн ба ийнхүү олны хүртээл болж байна.

Энэхүү ном нь түүний кино зохиолын гар бичмэлүүдийг эмхэтгэн нэгтгэж кино уран бүтээлд дүрийг улам тодруулдаг чанаруудыг хэвээр бичин үлдээснээрээ онцлог бөгөөд залуу уран бүтээлчид болон киноны мэргэжил эзэмшихээр суралцаж буй оюутан залууст чухал гарын авлага болох юм.

Тус номын нээлтэд зохиогчийн үр хүүхэд, төрөл төрөгсөд болон Кино урлагийн зөвлөлийн гишүүдийн төлөөлөл, салбарын нэрт уран бүтээлчид оролцлоо.