Бурхан Халдун уул, түүнийг хүрээлсэн тахилга шүтлэгт газар нутгийг 2015 онд Дэлхийн өвд бүртгэжээ. Бурхан Халдун уул нь Монгол орны зүүн хойд хэсэгт орших Хэнтий нуруунд хамаарна. Тус газар нь Монгол Улсын нийслэл Улаанбаатар хотоос зүүн хойш 250 км гаруй зайд, Төв аймгийн Мөнгөнморьт, Хэнтий аймгийн Өмнөдэлгэр, Батширээт сумдын нутгийн зарим хэсгийг хамран, далайн түвшнээс дээш 2362 м өндөрт оршдог. Энэхүү газар нутаг нь 443.739.20 га, орчны бүс нь 271.651.17 га талбайг хамардаг бөгөөд эх төрхөө хэвээр хадгалан үлдсэн ажээ. Бурхан Халдун уул нь Монгол үндэстний голомт нутаг, язгуурын монголчуудын өтгөс дээдсийг нутаглуулсан, Чингис хааны тахиж байсан, их хаадыг оршуулсан, монголчуудын эрхэм дээд шүтээн уул юм. 1995 онд төрийн тахилгат уул болгосон билээ.
Зураг авах зөвшөөрлийг энд дарж авна уу