21/09/2022Тайландын Бангкок хотноо энэ 9 дүгээр сарын 15-19-ны хооронд зохион байгуулагдсан “Тайландын Олон улсын кино наадам-2022” -т Найруулагч Д.Баттөмөрийн “TRIO” уран сайхны кино “Шилдэг Олон улсын кино” төрөлд нэр дэвшээд байсан юм.
Тайландын алдарт SIAM ENTERTAINMENT группын санаачлан хэрэгжүүлдэг, олон улсын ялангуяа Зүүн Өмнөд Азийн бүсийн гол кино наадмуудын нэг болох “Тайландын Олон улсын кино наадам-2022”-оос “TRIO” уран сайхны кино нь “Шилдэг олон улсын кино” төрөлд шалгарч цомын эзэн боллоо. Энэхүү төрөлд Солонгос, Япон, Польш, Итали, Англи, Тайланд, Бразилийн шилдэг кинонуудтай өрсөлдсөн юм.
Мөн Америкийн Нэгдсэн улсад энэ 10 дугаар сарын 7-9-ны өдрүүдэд зохион байгуулагдах “Palm Springs International Down Syndrome Film Festival”-д “Шилдэг Зураглаач” шагналын эзэн болсон мэдээг онлайнаар хүлээн авчээ.
Түүнчлэн энэ 10 дугаар сарын 14-23-ны өдрүүдэд Польшын Варшав хотноо зохиогдох “Варшавын Олон улсын Кино Наадам”-ын 38 дахь удаагийн арга хэмжээнд оролцох урилгыг хүлээн аваад байгаа билээ.
Үүгээр ч зогсохгүй дэлхийн А зэрэглэлд багтдаг Эстони улсын Таллины “ Хар шөнө” олон улсын кино наадамд “TRIO” уран сайхны кино нь “Industry@Tallinn&Baltic Event”-ийн тусгай урилгаар ELISA танхимд 11 сарын 21,24, 25-нд гурван удаа дэлгэцнээ гарахаар болжээ.
“TRIO” уран сайхны кино багт баяр хүргэж, цаашдын уран бүтээлд нь амжилт хүсье.
